A Poem About Girls By Manjeet Tiwana

ਕੁਝ ਕੁੜੀਆਂ ਲੰਮੇ ਰੂਟ ਦੀ ਬਸ ਹੁੰਦੀਆਂ ਹਨ
ਜੋ ਨੇੜੇ ਤੇੜੇ ਦੀ ਸਵਾਰੀ ਨਹੀ ਚੁਕਦੀਆਂ
ਕੁਝ ਕੁੜੀਆਂ ਬਨਾਰਸੀ ਸਾੜੀਆਂ ਹੁੰਦੀਆਂ ਹਨ
ਜਿਨ੍ਹਾਂ ਨੂੰ ਇਕ ਵਾਰ ਵੇਖ ਕੇ ਹੀ ਜੀਅ ਭਰ ਜਾਦਾ ਹੈ
ਕੁਝ ਕੁੜੀਆਂ ਸੁਨਹਿਰੀ ਫ਼ਰੇਮ ਵਿਚਲੀਆਂ
ਰੰਗਦਾਰ ਫ਼ੋਟੋਆਂ ਹੁੰਦੀਆਂ ਹਨ
ਜੋ ਕਿਸੇ ਵੀ ਡਰਾਇੰਗ ਰੂਮ ਵਿਚ ਸਜਾਈਆਂ ਜਾ ਸਕਦੀਆਂ ਹਨ

ਕੁਝ ਕੁੜੀਆਂ ਨਜ਼ਮਾਂ ਹੁੰਦੀਆਂ ਹਨ
ਜਿੰਨੀ ਵੇਰ ਪੜੋ੍
ਹੋਰ ਵੀ ਵਧੀਆਂ ਲਗਦੀਆਂ ਹਨ
ਕੁਝ ਕੁੜੀਆਂ ਪੱਛੋਂ ਦੀ ਪੌਣ ਹੁੰਦੀਆਂ ਹਨ
ਜੋ ਬਿਨ ਬੋਲੇ-
ਸੀਨੇ ਨਾਲ ਲਗ ਟੁਰ ਜਾਦੀਆਂ ਹਨ

ਕੁਝ ਕੁੜੀਆਂ ਤਿਤਲੀਆਂ ਹੁੰਦੀਆਂ ਹਨ
ਜੋ ਬਚਪਨ ਉਮਰੇ ਕਿਸੇ ਸ਼ੌਕ ਪਿਛੇ
ਸਾਰੀ ਉਮਰ ਵਰਿ੍ਆਂ ਦੇ ਪੰਨਿਆਂ 'ਚ ਕੈਦ ਹੋ ਕੇ
ਰਹਿ ਜਾਦੀਆਂ ਹਨ
ਕੁਝ ਕੁੜੀਆਂ ਚੰਦਨ ਦਾ ਬੂਟਾ ਹੁੰਦੀਆਂ ਹਨ
ਜੋ ਸੱਪਾ ਨੂੰ ਆਪਣੇ ਛਾਵੇ ਪਾਲਣ ਦਾ ਦਮ ਰਖਦੀਆਂ ਹਨ
ਕੁਝ ਕੁੜੀਆਂ ਜ਼ਮੀਰ ਹੁੰਦੀਆਂ ਹਨ
ਜੋ ਹਾਦਸਿਆਂ ਦਾ ਹਿਸਾਬ ਮੰਗਦੀਆਂ
ਆਪਣੇ ਹੀ ਸਰੀਰ ਦੀ ਸੂਲੀ ਲਟਕ ਜਾਂਦੀਆਂ ਹਨ
ਕੁਝ ਕੁੜੀਆਂ ਬੇਗ਼ਮ ਅਖ਼ਤਰ ਦੀਆਂ ਗ਼ਜ਼ਲਾਂ ਹੁੰਦੀਆਂ ਹਨ
ਜੋ ਬਹੁਤ ਘੱਟ ਲੋਕਾਂ ਨੂੰ ਪਸੰਦ ਆਉਦੀਆਂ ਹਨ
ਕੁਝ ਕੁੜੀਆਂ ਮਾਂ ਦਾ ਹੌਕਾ ਹੁੰਦੀਆਂ ਹਨ
ਜੋ ਅਸਮਾਨ 'ਚ ਕੁਆਰਿਆਂ ਦਾ ਰਾਹ ਬਣ ਕੇ ਰਹਿ ਜਾਂਦੀਆਂ ਹਨ
-[ਮਨਜੀਤ ਟਿਵਾਣਾ]