ਬਣਦੇ ਜਾਂਦੇ ਗਲ ਦੇ ਫਾਹ ਬਈ ਮਾਰੇ ਗਏ
ਘੋਟੂ ਦੇਵਣ ਲੱਗ ਪਏ ਸਾਹ ਬਈ ਮਾਰੇ ਗਏ
ਦੱਸਣ ਦਾ ਨਈ ਛੱਡਿਆ ਇਸ ਇਕਲਾਪੇ ਨੇ
ਵਿਕਦੀ ਪਈ ਏ ਜਿਹੜੇ ਭਾਅ ਬਈ ਮਾਰੇ ਗਏ
ਇੱਕ ਅਣਹੋਣੀ ਲੈ ਬੈਠੀ ਏ ਲੋਕਾਂ ਨੂੰ
ਸੁੰਞੇ ਹੋ ਗਏ ਵਸਦੇ ਰਾਹ ਬਈ ਮਾਰੇ ਗਏ
ਤੇਰੇ ਬੂਹਿਆਂ ਨੂੰ ਵੀ ਜਿੰਦਰੇ ਚੜ ਗਏ ਨੇ
ਰੱਬਾ ਦੇਵੇ ਕੌਣ ਪਨਾਹ ਬਈ ਮਾਰੇ ਗਏ
ਇਸਤੋਂ ਵਧਕੇ ਹੋਰ ਉਜਾੜਾ ਕੀ ਹੋਣਾ
ਚੁੱਲ੍ਹੇ ਚੌਂਤੇ ਉੱਘ ਪਏ ਘਾਹ ਬਈ ਮਾਰੇ ਗਏ
ਅਨਵਰ ਇਹ ਦਿਨ ਔਂਤਰ ਜਾਣੇ ਆ ਗਏ ਨੇ
ਹੱਥ ਮਿਲਾਵਣ ਦੀ ਨਈ ਵਾਹ ਬਈ ਮਾਰੇ ਗਏ
- ਮੁਸਤਫ਼ਾ ਅਨਵਰ
No comments:
Post a Comment