ਸਾਕੀ ਆਪਣੇ ਹੱਥਾਂ ਨਾਲ ਪਿਆਵੇਂਗਾ ਤੇ ਪੀਵਾਂਗਾ
ਬੁੱਲ੍ਹੀਂ ਛੁਲਕੇ ਭਾਂਬੜ ਵੀ ਜੇ ਲਾਵੇਂਗਾ ਤੇ ਪੀਵਾਂਗਾ

ਮੈਨੂੰ ਤੇਰੀ ਸਹੁੰ ਦਿਲ ਮਸਜ਼ਿਦ ਮੰਦਰ ਗਿਰਜੇ ਵੱਸਣ ਦੀ
ਸਜਦੇ ਵਾਂਗੂੰ ਜਾਮ ਚ ਨਜ਼ਰੀਂ ਆਵੇਂਗਾ ਤਾਂ ਪੀਵਾਂਗਾ

ਏਨੇ ਚੀਖ ਚਿਹਾੜੇ ਦੇ ਵਿੱਚ ਹਲਕੋਂ ਥੁੱਕ ਵੀ ਨਈ ਲੰਘਣਾ
ਭੁੱਖੇ ਰੋਂਦੇ ਪਿੱਟਦੇ ਲੋਕ ਹਸਾਵੇਂਗਾ ਤੇ ਪੀਵਾਂਗਾ

ਹੱਥ ਤੇ ਰੱਖਿਆ ਸੂਰਜ ਵੀ ਨਈ ਦਿਸਦਾ ਏਸ ਹਨੇਰੇ ਵਿੱਚ
ਇਸ ਮੁੱਖੜੇ ਤੋਂ ਜ਼ੁਲਫ਼ਾਂ ਦੂਰ ਹਟਾਵੇਂਗਾ ਤੇ ਪੀਵਾਂਗਾ

ਅਨਵਰ ਏਵੇਂ ਮਿੱਠੇ ਕੌੜੇ ਪਾਣੀ ਮੂੰਹ ਨਈ ਲਾਉਣੇ ਮੈਂ
ਅੱਗ ਉਦਰੇਵਾਂ ਨੇੜੇ ਬੈਠ ਬੁਝਾਵੇਂਗਾ ਤੇ ਪੀਵਾਂਗਾ

- ਮੁਸਤਫ਼ਾ ਅਨਵਰ